انا وتوتة توتة

انا الفكرة وانا الحدوتة
انا صرخة لكن مكبوتة

انا غاوى اعيش حاوى
واموت وايديا مربوطة

انا المولود بدون صرخة
جسد ملفوف بميت طرحة

اعيش واحزانى سكنانى
واموت محروم من الفرحة

انا ماشى جسد منحول
لسان ناشف خيال مبلول

تلومنى الناس فى أحلامى
عشان بحلم بقتل الغول

انا المنبوذ بأمر الله
وانا المنسوخ فى شرع الله

انا الموجود لكن مخفى
وانا اللى العقل ما ينساه

انا  فكرة تمس العرض
انا ممنوع فى دور العرض

عشان ماشى بنور كاشف
يقولو أنى خطر ع الارض؟

انا نقطة فى وسط حروف
انا مشهد لكن محذوف

انا ماشى حاضن قلبى
لكن قلبى بيموت م الخوف

انا ورقة فى وسط ملف
انا عنوانى فوق الرف

انا دايب فى احبابى
مع ان قلبى مات واتزف

انا ميت بدون أكفان
انا قبرى بطن حيوان

انا ميت بدون رحمة
قليل الرحمة يا أنسان

انا جملة يا ارض حروف
يا ميت حجة بأسم ظروف

يا ميت ايوه وميت حاضر
وساعة الجد مش معروف

انا نكرة فى وسط الكون
انا تومة وتحت الهون

انا مطحون صحيح لكن
عشان الطبخة كلو يهون

انا القصة وانا الحدوتة
وفى النهاية توتة توتة

يا تعيش بداية بلا نهاية
يا بكرة هتصبح حدوتة
وتوتة توتة

هروب

يـــــــاما هربت روحى منى
يـــــــاما تاهت فى الطريق

وفى طريق البعد عنـــــى
بنادى روحى كالغـــــريق

لما تهرب روحى منـــــى

تبقى مشتاقة اليـــــــــــك

الاقى روحى بتفارقنــــى
عايزه تدارى فى عنيـــك

عايزة تتوحد يا غالـــــــى
عايزة تتنفس معــــــــاك

ما تفارقها ولو ثوانــــــى
ما تحيرها فــــى هـواك

لما روحى بتهاودنـــــى
تبقى روحى بتلاغيـــك

ساكنة فيا وبتراودنـــى
وماشية تتلفت عليــك

قول لروحى لو تجيلك
كيف القلب يتحمل

تفوتنى لوحدى وتجيلك
فيتاه جوايه يتململ

قمر ف العالى

ياريتك بنت عمى
ودمك هو دمى

كنت اجيلك حد البيت
واكلم كمان امى

واقولها انى حبيت
كلمى لى قوام عمى

واجيب الورد ف ايدى
واقولك يا حلوة شمى

...

يا بنت الغالى يا بيبا
قمر ف العالى وحبيبة

تملى ف بعدى سكنانى
مهما تطول الغيبة

...

يا ضمانى فى كل دروب
يا وخدانى عاشق موهوب

انا ساكن حراب دربك
لكن دربك مليه الطوب

...

حبك ده دينى وانتشر
وانا الرسول وانتى البشر

ماشى ابشر انا بحبك
وانشر خلاصك فى البشر

...

جمالك انتى جمال الحور
بركة ونور

حبك خلى القلب يثور
ويعدى السور

حبك خلى القلب يطير
ويفيض بعبير

صوتك زى صوت عصافير
وكلك خير

...

حبيبة وهى عنوانى
وعرفانى

حبيبة وساكنة شريانى
وسكنانى

وغسلانى ورويانى
بماء تانى
ماء غير لى ألوانى

...

انتى الطريق
رغم المشى شيلانى

اوفى صديق
رغم الغربة فكرانى

...

انا ف البعد وحدانى
مليش تالت
مليش تانى

انا ليا حبيب بيغيب
ومهما يغيب
ده جاى تانى

انا ليا حبيب بيميل
جميل
والحسن ربانى

...

ياريتك بنت عمى
ودمك هو دمى

يا بنت الغالى يا بيبا
قمر ف العالى وحبيبة

 

حبك قدر

حبك قدر 
وع الجبين مكتوب
حبك غفر 
وكفر لى كل زنوب
حبك ستر 
وغطالى كل عيوب
 ندانى دون كل البشر 
وقالى دوب

بحبك يا أم نور باهر
وجاى طاهر
ومفهش اى عيوب

وف عشقك انا ساهر
تقى وطاهر
عاشق ضعيف مغلوب

انا المحبوب وانا المطلوب
وانا المبعوت رسول ربك
كتاب مكتوب

انا الاكل وانا الميه
انا لوحدى مقام 100
وانا المكتوب

انا فارس حارس حبك
انا فى دربك
بدوس ع الطوب
انا دمك وابن عمك
وفيكى الوصل مش معيوب

انا المقسوم من اللفه 
مهيش كوسة
انا المحبوب

وانا عريسك الخفة 
يا عروسة
يا عْقد قلوب

فى رحاب فالنتينو

فى دين العم فالنتينو
مذهب والناس معتنقينو
على نور الشمعه السهرانه
فاتحين الراديو وسامعينو

قديس و قاعد لى قدامى

وانا بـ ته ته فى كلامى

طبطب عليا وقالى بوح

وأمرنى افضفض بالامى 

انا العاشق وانا الولهان

وبتذكر ليالى زمان

انا لوحدى فى عيد الحب

وبتونس مع الاحزان 

هابى فلنتين يا حبنا الشايب

يا نبضنا الحاضر يا قلبنا الغايب

يابو خطوه تشل  مرعوشه

يابو ضهر محنى يـ ابو قلب دايب

كل سنه وانت هاجرنى

وانت رابطنى وانت أسرنى

كيفك هناك تفضل بعيد

وانت بعيد... بعدك كاسرنى

ياقلب وسهم ع الحيطة

يا اشيك بنت بيـ برنيطة

يا مرسومة ف دخانى

ياصوت اللمه والزيطة 

يا قصور ومبنية بكلام

يا طفل تايه ف الزحام

يارعشة جايه ف عز موت

يا اسم محفور ع الرخام 

انا الملفوف هنا بيكم

قتيل والقبر عنديكم

بردان وحاضنى التابوت

وبتشيع على ايديكم 

ياما كان نفسى انول الحلم

ويتحول خيالى لعلم

وتيجى تشعى هنا بنورك

ويتبدل سواد الظلم 

يا عيد الحب مت فى سلام

لعل عيونى غدا قد تنام

اطوى جراحى ودمع العيون

لعلى أعيش غدا فى وئام 

 

شيلو السلاح

ملعون ابوك ياســـــــــــكوت

يا ذل ناس مكبـــــوت

يا صرخة محـــــبوسة

فى قلــب قلـــب تابــــــــوت 

يا ارض متبــــــاعة

على الـــــــــــــــــــــف شماعة

يا ضحكة خداعة

ضحكة ماقــــــــــــــــــــبل الموت 

يا بنت فى صورة  مـصلوبة

وحتى الصورة مقـلوبة

يا نعمة وثـــــــــــــروة منهوبه

مفضلش منها القوت 

 يا طفل  بيغنى للشمس مستنى 

أصرخ بعلو الصوت

وعشان نشوف النهــــــــار وتعـــــــودى

دنــــــيتنا

هجمـــــنا هجــم التـــــتار وحفرنـــــــــا

سكـــــــتنا

لانسيـــــنا طعم المـــــــــــــــرار ولا قتل

سكـــــتنا

ملعون ابوك ياخــــــــــــــــــــوف متديشى

نحيــتنا 

شيــلــــــنا فـ ايديـــــــــنا الكفــــن والحلم......ودانــــــا

وفضــلنا نهتــــــف ونهــــــــتف والــــشعب......ويـــــانـا

ملــعون ابوك يا ســـــــــــكوت متعـــــش..........جوانـــا

ده الفـــــــــــــجر قبلتنا والــــــــــــــــــدم........وضــانـا 

حلمت بـــــيكى ف المنـــام

وفضلت أبنى فى الخيام

وكســــرت كل قيـــــــود حــــديد

وكل تماثيل الرخام

وعرفــــــــــت صوتــــــــك فى الزحام

لما ندهتيلى 

انا دقــت طعــــــــــم الحــــــياة لمـــا

ظـــــهرتيلى

ورجعـــلى عـــــــمرى اللى تـــاه لـــما

شاورتيلى

وانــا قلــــــبـى م الــفـرحه انــتــشى

داب واختشى

من بعد مرضـــــه قام مشـــــى

لما غــــــــمزتيلى 

يا دفء الضمة والاحضان

يا صوت اللمة والجيران

يا أم وقاعـــده ع الكرســى

وأب بيقراء ف القراءن 

يا طعم اللقـــمة فى دارى

يا غـــــنوة تحلى مشوارى 

ياقــصــة حـــــــــب هزليـــــة

ومكتـوبة فى أخبارى 

مين اللى صـــــفى العين

مين اللى باع الدم 

مين اللى غــــــــش الشعب

وحط ليكى السم 

مين اللى خان الامانة

وراضى ليكى المهانة

وعامل لى نفسه معانا

وبأيــده باع الحــــــلم 

يا ندهــــالى وهمـــــسالى  فى عز الليل

انا بطشـــــــــك باعداءك وصوت الخيل

يا بنت الناس يا مغصوبه يا فرع اصيل

انا نازل اجيب حقـــــك ..خارج كالسيل 

يا صـــوت الفاس  يا عرق النــــــــــاس  يا مر الكاس     

 انا الايد اللى سقـيانى

وانا الشــــــارب وانا المحتاس

وانا مرك  ما قسانى

امانـــــــة اسقينى من تانى 

ياطعم بيـــــــــــــــــــوت يا عقد ياقوت يا تار مثبوت

انا الايــــــد اللى قــــتلانى انا الغلبان  وانا الهلفوت

انا القـــــاتــــل وانــــــا الجانــــى

امانة تعودى من تانى
 

انا نازل عشان خاطرك

امانة تعودى من تانى

انا ادمنـت ريــح عطرك

 يامطلوقة فى شريانى 

يا مزروعـة على قبرى

يا مكتوبة فى اشعارى 

خلص الكلام

يا رفاقه  شدو الحــــــــــــــــــزام 

يا غاز مســـيل للـــدمـــوع

مفيش رجوع 

يا ضربة جاية فى الضلوع

مفيش ركوع

يا ايدين بالدم متعاصة

يا كلاب حراسة

وحاضر تمام 

يا فـ كل بناية قناصة

ب 600 الف رصاصة

قاتلة الحمام 

خلص الكلام

يا رفاقه  شدو الحــــــــــــــــــزام 

مدام سلمية منفعتشى

شيلو السلاح 

دماء شهداءنا مارحتشى

سداح مداح 

مدام الشمس مظهرتشى

شيلو السلاح 


عشان شهدانا وضحايانا والدم اللى ساح
شيلو السلاح

عشان ارواحهم فى قبورهم تقدر ترتاح
شيلو الشلاح 


شيلو السلاح
الروح ترتاح

شيلو السلاح

يهون الكفاح 

شيلو السلاح

يهل الصباح

شيلو السلاح

شيلو السلاح

شيلو الســــــــــــــــــــلاح 

مبقاش فاضل لى

مبقاش فاضل لى من حبك

غير شوية ذكريات 
 

دوسى عليهم وقتلينى

وشنقينى من سكات

وان سألوكى مره عليا

قولى انى ماضى وحب فات 
 

ملعون ابوه الحب

ملعون ابوها الحياة

مـ البداية وانتى عارفه

انى بكره السكات 
 

مـ البداية وانتى طبعك

أختراع المشكلات

وبصراحة انتى شايفه

كل يوم تنقص حاجات

والحقيقة انتى راضيه

ابقى عايش ع الفتات

 الحقيقة انتى عايزة

صورة تملا الالبومات

 انتى يدوب تبقى صديقة ... اوعشيقة 

نحكى ليها الممنوعات


 

اشطبينى من كتابك ... واعتقينى من عذابك  

وارحمى قلبى اللى مات

 خرجينى من سجونك ... واطردينى من عيونك

 وبلاش روتين الاجراءات

مدمعيش مره عليا

ومتعمليش زى البنات
  

بلاش كلام ع الانسانية

وبلاش كلام المؤمنات 
 

من صغر سنى وقلبى عارف

انه مخلوق للممات  

ملعون ابوه الحب

ملعون ابوها الحياة 

 

استجواب حمزة كاشغري

(( هذا الاستجواب من محض الخيال

تضامنا مع حمزة كاشغرى ))

أستجواب

مالك بالدين يا حمزة

دى قنابل فتاكة 

يابنى هو انت تفهم

فى نجارة وسباكة 

بيدك بهدلت دينك

يابن الشكاكة 

عاملى نفسك معلم

وامك دكاكة 

مالك بالدين يا كافر

يابن المشفوطة 

فكك يابنى وشربلك

قهوة مظبوطة 

عمال تنقد وتملص

وركبك مفكوكة 

عمال تفشر وتالف

حكاية وحدوتة 

مالك يا واد يا حمزة

ما تقصر ف الكلام 

ده انتا والمعزة واحد

لدبح والسلام 

ادى جزاة اللى يلخبط

ويخبط ف الاسلام 

بأيدك نصبت فخك

وصادوك زى الحمام 

قولى  لية فتحت مخك؟؟

ما كنت عايش فى السليم 

حكم  القتل هيكون بطخك

واللى يعيش بس اللئيم

بقالنا كتير بنصور

كلامك ع الفيس بوك 

وانت عمال بتهبل

وعمال ترغى وتلوك 

وحولنا أحنا القضية

للأمر بالمعروف 

ونهايتك يابنى سودة

ولسة ياما تشوف 

أديك هتموت لوحدك

وأصحابك دول باعوك 

بكره يشوفو حدك

و بالكتير... هيدمعوك 

متقولش لي .... سيبنى

وارجوك وأعمل معروف 

ده انتا والنعجه واحد

لكنك مش معلوف 

استحالة يعفو عنك

استحالة يرحموك 

قتلك انت حاجة سهلة

وبعدها مش هيشوفوك 

الفجر عندك زايد

والكفر والعناد 

والله بكرة هتولع

على ايدك البلاد 

لو سبناك عايش هتكبر

وهتكفر العباد 

اسمع كلامى والا

هدوس على الزناد

أفرحى ولا تزعليش

لو يوم قالولك ده حب غيرك 

أفرحى ولا تزعليش
ادى اللى عام وغرق فى خيرك

أصبح خلاص ميخصكيش




ادى اللى كان ملهش غيرك.... قادر يعيش
عشتى فى وهمك كأن طيرك....ملهش ريش
فمتزعليش




ومتزعليش لو قالو ناسى شكلك واسمك
مش ده اللى كان ع الحيطة راسمك
مش ده اللى قال:  روحه ساكنة جوه جسمك
ولا كلامه.....ميخصكيش ؟؟!!




ادى اللى كان حتة ولد .. ملهش ريش 
اصبح بطل مليون رواية... مبتنتهيش
وكل يوم عايش حكاية ...من النهاية
اصبح ولد....... ميختشيش




وصبحت حيطانه أرض حكايات
يزرع غزل تطرح بنات
ومبقاش يفكر فــ اللى فات
فـانتى كمان ......متفكريش




بس لوحد قالك انه خاين... وانه ندل
وانه هو محبكيش .....متســــــكتيش
أصل انتى عارفه.. قد اية طول غيابك ؟
وكـــنتى حتى........ مبتسأليش








الف مره قلتهالك....وكنتى قاصدة متسمعيش
أرجعيلى يا أغلى غالى.....وكنتى برضو مبترجعيش




هى كلمة اسمعيها ...وبعدها متسأليش
قلبى لما حب غيرك ...حب بس علشان يعيش




صدقينى مخنتكيش




تملى سهتانه ودلوعـــة غلــــــــبانه
وابسط كلام عندك .....معلش تعبانة


فكرتينى بهشـــــــــام وحكايته مع نانا
انتى ( .... ) وهى نانا...وع الاسامى مدقيش






قولى فاضل لينا اية..عشانه هنعافر
ومركبك ولا يوم رست.. وطوالى بتسافر




وقلبى من قسوتك..... يصعب على الكافر
وبصراحة انتى قاسية ..... مبترحميش




باعت انا ف جوبات...مشتاق انا لــردك
مكتوبة بالانات ..ترميها لية ف درجك ؟


مبين لقاء وفراق ....ملاقيشى غير صدك !!
حتى فى صــــــــــدك ... مبتوضحيش








 عارفة طول مانتى فيتانى وعيشالى ف الغربة
بمشى وانا بضحك وف جنبى 100 حربة




عايش كما الميت ....لكن مليش تربة
وحتى الرحمة .....متجوزليش








من ساعة ما فوتينى والدونيا لاوية البوز
بطنطط عشان تضحك وبعملها اراجوز




الجسم جسم شباب ... والقلب قلب عجوز
والعمر فات يجرى ....يجرى ولا رجعتيش








لو يوم سمعتى انى عايش وانى حى
 وان بعدك مهزنيش ...افرحى ولا تزعليش




 الف مرة قلتهالك ...غصب عنى قلبى حب
ولما حب ...حب بس عشان يعيش




فـــ أفرحى ــــ ولاــــــ  تزعليش 

 

متفكريش فيا

 متفكريش فيا ومتذوديش همك
مفيش امل فيا ومظبوط كلام أمك



واحلامى مش ليا ...حتى اسألى عمك
فامتقربيش ليا .. وحبى اللى من دمك


ومتتمسكيش بيا .....ومتميليش بختك
فرق السما بينى ..وبين عريس أختك


مين اللى قال خايف ...ده انا بريد راحتك
ده انتى السما بحالها ... وانا بعيش تحتك


وعيونى مش متغيرة .. ولا خفت من ساحتك
بس انتى لسة صغيرة ..ومعرفاشى مصلحتك


وانا قلبى ميحملكيش .........ولا احضانه هتساعك
وانا عايب فامتحاوليش .......... تحلى فيا بدراعك


وميغركيش شكلى ده انا شكل ع الفاضى
انا قلبى بير ميه ........لكنة بير فاضى


وما دمت انا ميت .. لية نتعب القاضى
حرام وقتك يضيع .. يا حبيبتى ع الفاضى


عشت سنين واخدنى الطيش وكنت ف كل ايد لعبة
وبعد ما توهت انا وحفيت.... قلت اعود من الغربة


وقلت اتوب على ايدك............. مدام التوبة مش صعبة
اتارى التوبة متكفيش ..........ولا طوفانى فى الكعبة


فا مترقصيش وسطك ...ولا تمسكيش طبلة
لا كنت يوم عنتر ...ولا كنتى يوم عبلة


ولا قلبى كان عابد....... ولا يمك القبلة
ولا فى عنين اهلك ...راح تفرق الدبلة


ومتحسبيش ياما ..عيزاشى هيا حساب
ده انتى زى اليمامة ..وانا زى الغراب


عشقت قبلك كتير ومفضلش فيا شباب
عاملونى زى الامير ورمونى رمى الكلاب


وعلمت ف قلبى ياما ما انا قلبى كان كُتاب
حفظت الابيض والاسمر.. وسمعولى غياب


حفرت فيهم كلامى  وسطرت سطور عذاب
ما انا اصلى كنت المؤلف وهم كانو الكتاب


انا قلبى كان استراحة ...معمولة للزوار
فيها الامان والراحة .. ومفتوحة ليل ونهار


وانا قلبى ياما اتملى ...بس الزمن دوار
سيبينى اموت ف الخلا .. وكملى المشوار


ما كلهم كسرونى ....وخلونى 100 حتة
زمان انا كنت مجدع....... وفارس الحتة


دلوقتى مش شايف وبجر ف الجتة
بمشى وانا محنى وكامش فى جاكتة 




ايوه انا مكح كح و600 كحكوح
بمشى وانا بنهج وعايش حلاوة روح


العمر ضاع منى والقبر باب مفتوح
فا متعى عنيكى بالفرجة فوق السطوح




وانا قلبى ماشى غلط  ولا عرف يختار
لحبايبة بالع الزلط وبيصدق الاعذار


معرفش يعشق ع كدو وعمال يدوس ع النار
وادى الزمان هدو .... وانا هضربو بالنار

فا متفكريش فيا ومتذوديش همك
مفيش امل فيا ومظبوط كلام أمك
 كونيش ف يوم ليا وحبى اللى من دمك